విభజన

మన నుండి మనల్ని
వేరు చేయడానికి వేన వేల ప్రయత్నాలు

ఎన్ని రకాలుగా విడి పోదాం ?
కులాలుగా, శాఖలుగా
మతాలుగా , జాతులుగా
వర్ణాలుగా , వర్గాలుగా
ఉన్న వాళ్ళుగా, లేని వాళ్ళుగా
దేశాలుగా, ప్రాంతాలుగా , భాషలుగా
ఖండ ఖండాలుగా ఎన్ని ముక్కలవుదాం ?
ఇంకా ఎన్నెన్ని రకాలుగా విడ గొట్ట బడదాం ?

ఒక్కొక్క విభజన వెనుకా
ఎన్ని స్వార్థాలు , మరెన్ని కుట్రలు ?
చైతన్యం చిగురించ కుండా
రక్తం పారించి
రణ భూమిగా, మరుభూమిగా
మార్చే ప్రయత్నాలు ఎన్నెన్నో ?
రగిల్చిన విద్వేషాలు , వైషమ్యాలు ఇంకెన్నో ?
ఒక్కొక్క సందర్భంలో
మన నుండి మనల్నే
వేరు చేయడానికి వినిపించిన కారణాలు
ఎన్నో ? ఎన్నెన్నో ?

పరస్పరం ప్రేమించడానికీ ,
చేయి చేయి పట్టి కలసి నడవడానికీ
మనం మనుషులమన్న
ఒక్క కారణం చాలదా ?