ఉత్తరం వ్రాయ లేదని చిన్న బుచ్చుకోకు నేస్తం !
>> Sunday, January 10, 2010
ఎప్పుడో ఒక్క సారీ కాదు
ఏడాది కొక్క సారీ కాదు
ఏ కారణమూ లేకుండా
నాలో నేను నవ్వుకున్నప్పుడూ
మీరు పంచిన ఆప్యాయతల
తలపులలో తలమునకలై
కళ్ళు చెమర్చినపుడూ
వేల మందిలో వుంటూ ఒంటరి నైనపుడూ
అడుగు దూరానికీ ,
అనంతానికీ మధ్య ఎక్కడో
చూపు చిక్కుకు పోయినప్పుడూ
ఎప్పుడూ
పూవును చూసినపుడూ
తెమ్మెర స్పృశించి నపుడూ
జల్లులు కురిసి నపుడూ
హరివిల్లు విరిసి నపుడూ
వెన్నెల విర బూసి నపుడూ
పసిడి ఎండ పలకరించి నపుడూ
ఎప్పుడూ
మీరు నా చుట్టూనే వుంటే
మీ తలపులు మదిలో పదిలంగా వుంటే
మీ రూపాలు కళ్ళ ముందు మెదులుతూ వుంటే
ఆత్మీయులందర్నీ అక్కున చేర్చు కున్నట్టుగా వుంటుంది
ఉత్తరం వ్రాయ లేదని చిన్న బుచ్చుకోకు నేస్తం !
ఇవాళ కొత్తగా ఏమని వ్రాయను ?
మరచి పోతే గదా ! మళ్లీ గుర్తు చేసు కోను ?
